Iu di quant'avi chi da Sicilia mi nn'ivu nun sacciu n'soccu manciu e n'soccu vivu va fazzu a spisa e m'accattu a scalora ma un pozzu diri ca è frisca d'ora d'ora accattu u pumadoru, u pipi e a lattuchedda cu a spiranza ca un m'ammazzanu i vudedda m'accattu l'ogghiu e mancu sacciu s'è nisciutu du trappitu accattu pani ca pi mantenisi ci uncinu spiritu la farina è raffinata nun sacciu di quali manera e sempri mi fiuru ddu furmentu crisciutu a Bifarera Lu vinu ca a taliallu parissi puru tocu è chinu di surfiti ca cu un cirinu pigghia focu c'è la buttigghia di cincu euru e chidda di deci e sempri mi fiuru ddi filara curtivati a lu Buceci Passu di lu bancu surgelati m'accattu funci già pronti e priparati nun si po diri ca a mancialli su na perla e mi fiuru mazza di tammuru e funci di ferla Comu a fari pi truvari na cosa genuina ogghiu di trappitu, ova frischi, la vera farina lu fattu è ca lu pitittu veni e addumanna saziu allura vegnu a lu discanti a paari lu daziu e la terra chi un tempu mi dava tuttu mi la fiuru nta stu carrellu chi ora ammuttu.
(Ezio Spataro)
