I poesii un s'appizzanu mmenzu a strata

I poesii un s'appizzanu mmenzu a strata
cu i cristiani chi passanu e talianu
un ci piaci tuttu stu scrusciu

I poesii si vulissiru sulu ammucciari
un si vonnu fari taliari di nuddu

e cercanu ummira unni arripusari

I poesii vulissiru scappari
di nta stu munnu favusu
ca ci tagghia li radichi a lu nasciri

Li poeti di oggi e d'aeri
s'affruntanu di chiddu chi scrivinu
e li poesii mancu iddi li vulissiru taliari

Si putissiru scumpariri di la facci di la terra
pigghiassiru lu trenu di notti
prima c'affaccia lu primu suli

Picchì la luci di lu iornu
cci abbrucia li pampini ancora virdi
e li poesii nun si ponnu chiantari n'atra vota

Sempri vannu circannu ummira
voschi cchiù antichi di la petra
e ruvetta unni ammugghiarisi

Li poesii nun si vonnu fari taliari
sunnu comu lu lippu ca talia l'ummira
criscinu unni lu suli nun ci batti

(E.S.)