Questa è la scena del film "Pulp Fiction" di Quentin Tarantino cui si fa riferimento in alcuni versi della poesia. Lo scambio di premi, riconoscimenti e complimenti è un' usanza molto diffusa nelle piccole comunità e contribuisce non poco ad arricchire il curriculum socio-culturale delle persone che la praticano.
Cu cunta a Marinè
un cunta m'Palermu
e cu cunta m'Palermu
cunta puru au nfernu
sempri nta un paisi
c'è corcunu chi cunta
si c'è corcunu chi l'avanta
Chissi su come lu ventu
e nuddu si cci para davanti
comu quann'è tramuntana
e la genti s'arrassa e s'alluntana
comu quannu c'è sciroccu
e a la genti ci pari
va vidi nzoccu
comu quannu organizzanu ss'eventi curturali
e pari ca ciusciassi lu maistrali
comu quannu la pulitica è cummerciu
e pari ca ciusciassi lu libecciu
Chissi chi cuntanu
allura la spuntanu
picchì nuddu fa nenti
picchì l'autri su gnuranti
allura vannu comu lu ventu
e nuddu li ferma
mancu si nni paramu centu
Chissi chi cuntanu a Marinè
ragiunanu cu "lu dammi e tè"
comu nta un firm di Tarantinu
unu cu l'autru si fannu ammuinu
io vantu a tia
tu vanti a mia
iu ti vasu
e tu mi vasi
siddu m'ha stima ti salutu
asinnò passu grittu e sputu
iu ti salutu si tu mi saluti
nta stu paisi di saputi
Cu cunta a Marinè
cunta puru a Bifarera
si metti lu cappeddu
ma si cala la pampèra
accussi nun vidi nenti
e po ghiri sempri avanti
accussi nun vidi a nuddu
e pò fari tempu tintu
e tempu beddu
Chissi chi cuntanu a Marinè
vannu trasennu unn'egghè
trasinu a la chiesa
e attrovanu na casa
trasinu au casteddu
e s'arrustinu l'agneddu
trasinu m'pulitica
e attrovanu l'Amedica
Nuautri cucuzzi senza simenza
chi capemu di cultura e scienza?
Iddi fannu discursi e sirmuna
pi nuatri poviri gnurantuna
iddi parranu e iddi dicinu
iddi dissiru e iddi ficiru
iddi cuntanu e iddi fannu
iddi c'eranu e iddi sannu
E' beru ed è un fattu :
cu cunta a Marinè
cunta puru a lu Strasattu.
(Ezio Spataro)
