e mi fazzu centu iorna,
l'autri ducentusessantacincu
vaiu facennu travaggheddi
a ringu a ringu,
e mancu ci pau tassi
m'arrestanu nta la sacchetta puliti puliti
atru chi vaucer e picciuli di cittadinanza
iu travagghiu pi fari sustanza !
Travagghiu a lu voscu
e mi fazzu centu iorna
ma di travagghiu veru cci nn'è cinquanta,
avemu cinquantunisti
centunisti
centucinquantunisti
ed effettivi
avemu puru lavativi
cci nn'è di tutti li maneri
certi voti travagghiamu
ma è comu si fussimu n'ferii
sulu accussì putemu mettiri a pignata
e un campari sulu di nzalata !
A me figghiu ci staiu lassannu un pianu
c'è sulu di ittari suletta
e isari quattru tabbii
mi staiu assistimannu puru a me figghia
ca s'ava maritari
e dicu sempri : l'importanti travagghiari !
A Marinè avemu un bellu voscu
è nicu, ma pi nuatri capi quantu l'Alaska
ogni tantu corcunu duna focu
e menumali, picchì asinnò finissi lu iocu
si nuddu vinissi a ddumari
nuatri chi pasta avissimu a calari?
A me figghiu cci dissi di fari lu cuncursu
ca siddu cc'è postu nunn'è dittu ca va persu
picchì Marinè avi na gran foresta
e li forestali a n'atra nticchia si li va mpresta
nta tuttu lu territoriu di Marinè e di la Chiana
cci travagghianu cchiù forestali ca n'Germania
e si cuntamu li sarmi di Bifarera e Salardinu
cci travagghianu cchiù forestali ca n'Trentinu
Ora certuni nni cercanu la calunia
ca la Sicilia nunn'è quantu l'Amazzonia
ma quannu veni lu tempu di iri a vutari
chiddi ca si portanu
com'egghè la fannu allargari
picchì lu voscu è comu la casa
e capi quantu voli lu patruni
siddu livassiru tutta ssa manciugghia
cu cci lu duna lu votu
... la muggheri e la figghia ?
Ora dicinu
ca nta lu meridioni nun c'è pil
ma li nostri fimmini
avogghia s'hannu pil
e sempri cci dicu
a ddu babbu di me figghiu
statti a Marinè
ca all'atri banni
pilu nun ci nn'è !
Voli emigrari pi travagghiari
stu pezzu di babbu e carnalivari
cu aviri la casa pronta
ca cci manca sulu l'affacciata
si nn'ava gghiri a casa affittata !
Iu cci dicissi a chissi chi sdunanu
scuttati li sordi e pò vi li fumanu
quantu vali aviri na proprietà
ca nun c'è travagghiu ca ti pò dari cchiù dignità
travagghiuniàti com'egghè nta sti cuntrati
e mettiti sordi n'sacchetta senza tassi paati
dati lu votu a cocchi putenti
mmeci di partiri e fari li pizzenti
com'egghè capita la cugnintura
ca vi porta nta cocchi manciatura
Stu me figghiu si voli mettiri n'regula
e iu mi sentu pizzicatu comu di l'ardicula
Attenta a mia figghiu me !
cu chiddu chi ti dunanu fora
pò manciari sulu pasta cu a scalora !
Dicci a lu cuvernu ca t'attrova la copertura
mentri manci pasta e birdura !
Anzi ora ca ci sunnu l'eroi
ca dicinu c'arrestanu pi canciari sta terra
picchì un ti cci unci puru tu
a fari ssa guerra?
Nun ti pigghiari firnicia
d'arristari culu n'terra
si perdi lu travagghiu
to patri è sempri cca'
bagghiu bagghiu !!
(Ezio Spataro)
