Eh pinsari ca n’Sicilia aiu li beddi vraccoca
ca a talialli mi veni a peddri d'oca
Eh pinsari ca s'hannu a sfari
e iu nun mi la putiri manciari
picchì travaggiu luntanu da me terra
e m'arricampu nt'austu
pi la fèra
Chistu è un distinu riu
c'appena scinnu iu vraccoca nunni viu
Ccà s’accattanu
a sangu di papa
e ddà su muzzicati di la lapa
cadinu n'terra.... si fannu minnitti
e si l'allapatìanu li muschitti
Chista è na sorti a malumodu
ca li frutti da me terra iu nun mi li godu
Ccà m'accattu li cosi a pisu d'oru
mentri n’Sicilia si sfà lu pumadoru
Arbuli carrichi ca pinnulianu li rami
e io sugnu ccà a chianciri la fami
Si sfannu li pruna, si sfannu li vraccoca
e iu ccà a chianciri n'atra vota
(Ezio Spataro)
