Chiazzaloru vinutu nta la chiazza
tu si fumaturi di la peggiu razza
va caminannu comu un piddirinu
arrivi n'Terra Santa fumannu un tuscaninu.
Ti fumi lu sicarru parrannu cu n'amicu
e quannu fa pitittu ti fumi l'allammicu
cummatti la to fami saziannuti a catrami
e quannu grapi vucca ... chi nivuru dintami !
Chiazzaloru vinutu nta la chiazza
tu si sparritteru di la peggiu razza
discurri d'ogni cosa succedi a lu paisi
allogni lu discursu simani e puru misi
e canti la to missa a sinnacu e cunsigghiu
si tu lu gran dutturi, l'espertu di curtigghiu
a tutti cci cuntasti li ciciri e li favi
ma ancora lu to occhiu strascina la so travi
Chiazzaloru vinutu nta la chiazza
lu to pinzari trubbulu si fici comu fezza
nun paghi lu to obbulu e parri assai fitusu
ti nesci di la vutti lu vinu acitusu
(Ezio Spataro)
