mmenzu a li filara di lu tempu,
viu crisciri l'erba,
la viu addivintari frasca
e attaccarisi unn' egghe',
pari ca un si po scippari cchiu'
di quantu si fa gavuta.
Mi movu mmenzu a sti filara
stannu attentu a nun mi mpasturari
m'aiu a calari la testa e tenila vascia
pi nun truzzari cocchi rama sarbaggia
Lu suli nun pigghia cchiu di sti bbanni
l'ummira s'agghiutti tutti cosi
e s'abbriviru nun portu vita
ma umitu e prinospira
Mi movu nta sti filara
comu si lu munnu fussi tuttu cca mmenzu.
Nun viu a nuddu nta st'erba
corcunu ca mi truvassi e mi purtassi fora
puru lu suli nun sapi comu arrivari
Nun la trovu dda bedda liama
ca mi facia sentiri patruni di la vigna,
quannu putia mpupari
e ripurtari a la terra lu so culuri.
(Ezio Spataro)
