Cave Cavem

Cava di Roccabianca presso Marineo (PA)

Si mancianu la muntagna

comu si spizzuliassiru pani

e a manu a manu

si futtinu puru lu muddicuni

pinzannu a li dinari

c'assummanu nta lu casciuni

e quannu la crusta cedi

e nun c’è cchiù pani di cavari

ncapu li cristiani 

fannu cadiri petri 

comu li stiddi di natali.

E  l’attività cummirciali ?

Chiddi ponnu chiuiri

nfinu a quannu c'è pirciali
anzi, capaci ca a Natali

cocchi stidda

putissi ancora sciddicari !

Ficiru comu lu surci a la nuci 

si pigghiaru lu tempu di pirciari

e stu paisi comu s’arridduci

ora nuddu lu sapi spiari,

a la trasuta di mmernu

si sapi però

ca lu pani sta finennu

Spizzuliaru a ringu a ringu

facennu sordi comu a bingu

e lu pani a sta genti

ora cu cci lu duna ?

Ora ca cci manca la terra

e nun ci serbinu li zzapuna.

Sutta l'arbulu di Natali
nenti sciampagna e nenti panittuni

pi genti scampata a lu spitali

sa cchi cci parsi

ddu pezzu di custuni

na sganga di cubaita

o un pezzu di turruni ?

(Ezio Spataro)