Qoelet

L'omini di sta terra
sunnu aceddi senza posa
si curtivanu la serra
si cci chiantanu la rosa 

di lu friddu e l'intemperi
s'addifenninu lu ciuri
e cci mettinu fumèri
pi rristari cchiù sicuri

Quannu arriva un forti friddu
e la terra è di cristallu
di stu ciuri e d'un capiddu
nun ci nn'è, mancu a paallu

Nta sta terra nun c'è largu
pi li ciuri sempr'eterni
nta lu sonnu d'un letargu
nni sbitaru viti e perni

Nun mi serbi fari un votu
la disgrazia arrè mi vasa
veni lestu un tirrimotu
cadi tutta la me casa

Tu Qoèlet si cuntentu
si curtivu la me rosa
quannu sicca un mi nni pentu
la me terra s'arriposa

Tu Qoèlet si cuntentu
si curtivu lu me ciuri
quannu veni friddu e rentu
su cuntati li me uri

Tu Qoèlet si cuntentu
si curtivu la campagna
st'arrivannu un forti ventu
sentu l'acqua ca mi vagna

(Ezio Spataro)

Punk Rock

Sid Vicious

Punk rock su canzuna

ca t’appizzanu punzuna

cali e ghisi la to testa

coddu mancu ti nn’arresta,

nta na cresta di capiddi

di menziornu vidi stiddi.

La chitarra a tavoletta

nun si ferma e nunn’aspetta

li bacchetti vannu appressu

e si satanu è lu stessu,

sti canzuni nun su fini

fannu scrusciu di catini.

Quattru accordi arripizzati

di chitarri assai scurdati

fannu moviri na fudda

comu ventu nta la sudda

nun ti senti cchiù lu coddu

lu suduri chi ha di ncoddu.

Lu cantanti ecca un gridu:

“di cu è bonu nun mi fidu!!”

la so vuci abbrasiva

comu nesci accussì arriva

nunn’è tempu d’abballari

è lu tempu d’ammuttari.

Cu s’ha vistu lu concertu

di sta musica è l’espertu

e ghiccatu nta la ressa

la so vita unn’è la stessa,

nta la fudda l’ammuttaru

assai voti lu pistaru!!

Lu cantanti comu un farcu

pigghia e vola di lu parcu

lu tappitu di la genti

si l’appara e un dici nenti,

iddu pensa ca satannu

nun fa mali, nun fa dannu!!

(Ezio Spataro)

U motozzappa

Di nicu e nicu mi nsignavu a purtallu
prima di la discoteca e prima di lu ballu,
a nesciri di lu fangu e passari la sintìna
mi squagghiava la iurnata arrivannu a siritina.

Me patri mi nsignava u giustu versu
ma la terra era caina e mi vitti troppu persu,
chi pacenzia cci vulia pi scansari u pumadoru
di stanchizza io dicìa: stasira moru!!

Ntunnu a li favi cci ia cu lu zappuni
cu li troffi chi siccavanu priparava lu cuvuni,
p'addumari focu eranu megghiu di la frasca
e mittianu manciaciumi d'arrasparisi la nasca.

Di fatica e di suduri mi sintia n'armalu prenu
ma finennu lu travagghiu mi taliava lu tirrenu,
era bellu pittinatu, a taliallu paria un pupu
mi grapia un gran pitittu ca pò aviri sulu un lupu!!

La fatica chi cci voli a badari cu la terra
è la stessa d'un surdatu ca cummatti la so guerra,
si nta na trincea di timpuna e pitrulizzi
ca si sgriddanu nta l'occhi la to vista ci l'appizzi.

Scarpi nfangati e terra assai nni vitti
petri assai funnuti e sarmenti belli gritti
capuliava tutti cosi cu li zappi di l'attrezzu
ca cci metti la benzina e lu fa pezzu pi pezzu.

E' sempri comu un toru lu vecchiu motozzappa
cu l'afferra pi li corna iddu nun l'ammazza,
quannu avi siti tu ci duni la benzina
e riparti cu la grinta di spaccari la carina!!

(Ezio Spataro)

Cori Granni

Cu è Cori Granni? Cori Granni e' il don giovanni della politica, colui che è abile nel sedurre e conquistare i suoi elettori che poi gli donano non tanto il cuore, ma quello che a lui più interessa, il voto.
E' il Robin Hood della politica al quale il povero cittadino si rivolge per avere ciò che gli spetterebbe di diritto. Cori Granni e' quel politico che non ha alcun pensiero politico e che considera la politica solo un affare redditizio per se stesso, e se gli va bene anche per quelli che gli danno il voto. Cori Granni è come don Giovanni, promette amore in cambio di fiducia e abbandono, ma quando le povere amanti scoprono l'inganno è ormai  troppo tardi.

Aiu un figghiu accussì beddu

ma cci manca un pusticeddu,

quannu vennu sti malanni

megghiu dillu a Cori Granni.

Stu me figghiu è già laureatu,

ma ancora unn s'ha mpustatu

cu si metti nna i so panni?

ci dicissi a Cori Granni!!

Tu ca si disoccupatu

e nun vidi mai lu CUD,

Cori Granni t'ha pinsatu

iddu è comu Robin UD:

leva un postu a cu era riccu

l'arriala a un puvureddu,

è un cristianu assai di spiccu

ca t'attrova un travaggheddu.

Di proverbi, li cchiù antichi

c'è "cu mancia fa muddichi",

stannu a latu di cu mancia

la me vita assai mi cancia.

Nun ti fari arrè stu cuntu:

"Cori Granni è opportunista"

nun lu fa pi turnacuntu

picchì è d'animu altruista.

Quann'è tempu d'elezioni

è cuntentu si ti vidi,

avi tanta commozioni

picchì d'iddu tu ti fidi!

Io lu votu cci lu detti,

aspittamu li verdetti

siddu acchiana a la regioni

semu allura misi boni!!

(Ezio Spataro)

Metal

Na vota m'attintava
la musica metallara
e ogni ghiornu chi passava
m'affussava nta la vara

Mi vistìa sempri di nivuru
nun purtava però luttu
di metallu facia ciavuru
la me musica era tuttu

Magliettini metallari
nn'accattavi nta ogni fera
accussì spinnìa danari
era propria n'atra era

Di lu gruppu Sepurtura
m'avia fattu na curtura
nta ss'avanzi di galera
cci sunava Cavalera

C'era un gruppu assai bastardu
ci sunava Dave Lombardu
e maniava ddi bacchetti
ca trimavanu li tetti

Cu attintava e nun capìa
di sta musica dicìa:
"pari scrusciu di na lanna,
unu attenta e pò s'addanna"

Quali foddi lu mmintaru
stu metallu arrancidusu ?
Addumanna a lu firraru
ca ogni ghiornu nni fa usu

Ora sempri vaiu pinsannu
quanti corpa detti tannu
dda chitarra strapazzata
si zittì nta n'agnunata

Si carmà la gran faidda
ca cumanna sempri idda
chi ti veni e chi ti spinci
e a carmalla tu nun vinci

Ora è friddu lu metallu
è difficili a maniallu
la me furma la pigghiavi
ma di iddu un mi scurdavi

(Ezio Spataro)

Vincenzu Eternu

Un estate di circa 10 anni fa, partii da Marineo verso l'entroterra, con una mountain-bike modello "a comegghè" e zaino in spalla,  giungendo all'estremo lembo orientale della provincia di Enna, laddove l'Etna comincia a farsi già vicino. Il viaggio in solitario, durò 9 giorni, percorrendo una media di 50 Km al giorno, per un totale di 450 Km circa. Era il mese di luglio, faceva molto caldo, la temperatura media giornaliera era di circa 35 gradi. Partii da Marineo attraversando parecchi paesi dell'entroterra:

Alia, Caltavuturo, Polizzi Generosa, Petralia Sottana, Gangi, Nicosia, Troina, Agira, Villarosa, Vallelunga, Marineo.
Partivo ogni mattina senza sapere dove avrei dormito la sera, chiedendo ospitalità alla gente che incontravo nei vari paesi che attaraversavo, perloppiù preti, frati e suore. Ma una volta a Polizzi Generosa vi fu un vecchietto che si offri spontaneamente di darmi ospitalità a casa sua. Si trattava del signor Vincenzo Eterno, che guarda caso conosceva un vecchio signore di Marineo che aveva lavorato con lui da giovane. Bastò questo semplice ricordo per  indurlo a fidarsi di me e ospitarmi. Ma la sera quando rientrai a casa, lo trovai affacciato alla finestra con l'aria triste. La moglie lo aveva avvertito del pericolo di mettersi in casa un estraneo, e fu cosi che  mi propose di dormire dentro la macchina di un ragazzo col quale avevo fatto amicizia nel pomeriggio, un certu Peppi Prima. Anche questo giovane aveva lavorato assieme ad un giovane marinese, il mondo è piccolo. Peppi Prima ovviamente non mi fece dormire nella sua macchina, ma dentro lo studio di un suo amico geometra.

Quannu avia vinticinc'anni 

pussidia na bicicretta

l'avia cara e la trattava 

megghiu ancora di na scecca,

pidaliannu, unni vulia 

mi purtava a tutti banni

nta li voschi, nta i paisi, 

nta lu mari e li muntagni.

Na staciuni iu partivi 

arrivannu assai luntanu

di Marinè a li Petralii 

e poi versu lu vurcanu,

ci fu un gniornu ca passavi 

di Pulizzi Ginirusa

un paisi beddu e anticu, 

di sti versi la me musa.

Un cristianu Pulizzanu 

vosi fari assai dumanni,

iu ci dissi lu me nnomu 

e c'avia vinticinc'anni,

ca passava di ssu locu 

ma era sulu di passaggiu,

bisugnusu di scurari 

p'affruntari arrè lu viaggiu.

Iddu allura, cori granni, 

scatinà la maraviggha,

senza mancu diri bizza 

prisintò la so famiggha,

quannu dissi lu so nnomu 

si cunsumà lu nfernu,

avia davanti l’occhi 

lu signor Vincenzu Eternu.

"Giovanottu, tu stasira 

pò scurari ccà nni mia",

chissu fu lu so parrari, 

ma l'aricchia un ci cridia,

nta li cosi chi cuntava 

mi paria accussi sinceru,

e la testa mi parrava: 

"ma po essiri ch'è beru?"

La sira a lu turnari, 

a la finestra era affacciatu ,

cu na facci anticchia trubbula 

e macari ca siddiatu,

cu mmia c'era un picciottu, 

si chiamava Peppi Prima,

di vicinu si parraru 

a tuccarisi la scrima.

"Peppi Prima, Peppi Prima 

fammi tu na cortesia,

la prumissa cciavia fattu 

di scurari ccà ni mia,

me muggheri nun si fida 

picchì dici ca è unu straniu,

nun po stari a la to casa 

di ddancapu a lu Carbaniu?"

Si lu largu ddà ti manca, 

nna tò machina pò stari,

pi na notti nun si mori, 

accussì si pò arranciari,

poi dumani all'arba parti 

e si metti arrè ncamminu,

iu ti fazzu sta prighiera, 

ca mi sentu ncurpa nchinu.

(Ezio Spataro)