Haiu disiu di sentiri na manu
ca strinci chidda me
di sentiri la vita
scurriri nta na manu d'omu
Avi assai ca nun nesciu di dintra
e nun sentu carni cu carni
avi assai ca sti vrazza
arrestanu a pinnuluni
Aiu disiu di caminari
a braccettu cu n'amicu
e cu la manu allintari
e strinciri lu so vrazzu
a secunnu di lu dicursu
quann'è cchiù animatu
pi faricci accapiri bonu
chiddu chi penzu
Avi assai ca nun parru
comu facianu l'antichi
cu li manu sempri avanti
ca sannu parrari cchiù di li paroli
Ora ca nni stamu ncuntrannu
tu sa cu sugnu e iu sacciu cu si
sti paroli chi nni stamu dicennu
nni furmiculianu nta li manu
(Ezio Spataro)
Nessun commento:
Posta un commento
Aggiungi un commento