Cu nun cridi a lu Signuri

Cu nun cridi a lu Signuri

campa patruni di li sò uri
ma cu cridi e prea Gesù Cristu
sapi campari sulu di chistu.

Cu nun cridi a lu Signuri
nun sapi spiegari lu sò duluri
amuri nun pigghia si veni arrialatu
lu voli cu meritu e bonu scuttatu.

Cu nun cridi a lu Signuri
vidi ch'è bellu e cogghi lu ciuri
ma cu cridi e avi la fidi
si cogghi ddu ciuri ca mancu si vidi.

Cu nun cridi a lu Signuri
sempri si scansa li mali fiuri
ma cu cridi au Patri Eternu
sapi passari puru lu nfernu.

Cu nun cridi a lu Signuri
sapi ca un tornanu cchiù li sò uri
ma cu cridi e prea la Madonna
nna li sò vrazza dormi e si nsonna.

Cu nun cridi a lu Signuri
di la sò vita si senti dutturi
ma cu cridi e prea li santi
avi la forza di centu elefanti.

Cu nun cridi a lu Signuri,
nun voli sentiri cruci e duluri
ma cu cridi e prea l'ancileddi
puru sti cosi ci parinu beddi.

(Ezio Spataro)