Doppu lu sonnu di na nuttata
mi godu lu suli a primu raggiu
La matinata fa la iurnata
dici un proverbiu anticu e saggiu.
E’ primintina la luci c'arriva
tutta la terra s'appara u so raggiu
e comu acqua di la surgiva
inchi la terra nta ogni paraggiu.
La matinata fa la iurnata
quannu passata è la nuttata,
di la minera d'un sonnu scavatu
nesci la gemma d'un gniornu rinatu
Pigghiu lu latti cu li viscotta
e di la vita m'arriva na botta
mancu lu tempu d'arrimuddari
ca ddi viscotta mi fannu vulari
cogghiu l'attrezzi di la iurnata
zappu la terra di la me vita
scavu li surchi pi l'abbrivirata
mettu simenza e subitu spica
Spremu la vita comu un limiuni
quannu lu iornu si metti affacciari
mi sentu forti comu un liuni
iu la matina mi mettu a cacciari
(Ezio Spataro - 2011)
