Un chiantu

Chiddu chi cunta

è farimi stu chiantu
ca squagghia lama e punta
a tuttu lu me vantu

nun cunta siddu cadu
e ghincu arrè la fossa
picchì stu chiantu duci
mi porta arrè la luci

s'adduma la spiranza
c'abbatti la superbia
ogni lacrima chi scinni
duna focu a lu me vantu

picchì di nenti
iu mi pozzu vantari
si mancu la vita
mi potti fabbricari

ogni passatu vantu
finisci nta stu chiantu
ca comu un mari apertu
s'agghiutti lu desertu

desertu di superbia
ca fa terra bruciata
di tutti li biddizzi
chi stannu a la purtata

(Ezio Spataro)