Lu tempu c'avanza
si mancia la frenza
nta tutti li so magghi
si nsidia la frasca
di lu "veni e cogghi"
si persi la fama
di lu "cogghi e mancia"
si persi lu distinu
Li vecchi scorci
di ficu munnati
li beddi vraccoca
nta l'arbuli lassati
li puma nterra
purriti e pizzuliati
di tutti chisti cosi
chianci lu iardinu
Nta ddu pedi d'aliva
persi lu panaru
nta dd'ogghiu di trappitu
cuvava lu me amaru
nta umitu e prinospira
truvavi lu me dannu
dda nzolia e ddu zubibbu
mi trassiru n'ingannu
Nta ddu pumadoru
si persi la me manu
nta dda tavula d'astrattu
si persi la cucchiara
m'arresta lu russu
d'un tempu sbiadutu
m'arresta lu giallu
di surfaru ittatu
di quannu lu ventu
ciusciava arrabbiatu
(Ezio Spataro)
Nessun commento:
Posta un commento
Aggiungi un commento