Era nuddu ed era nenti
lu dicìa Badalamenti
di Pippinu Mpastatu
ca poi vinni trucidatu
a la radiu li discursi
lu mittianu a la berlina,
lu mafiusu a li so ursi
cumannò a carneficina
l'aspittaru a lu passaggiu
dunni passa a ferrovia
era chiddu un novi maggiu
di spaventu e di fuddìa
A Pippinu lu mpastaru
cu farina di tritolu
e a so matri cci purtaru
lu duluri e lu scunsolu
l'attaccaru a lu binariu
cu li cordi da vriogna
comu Cristu a lu Calvariu
lu purtaru nta la gogna
la giustizia la so curpa
e pi chissu l'ammazzaru
cu tintaculi di purpa
Pippineddu l'aggranfaru
li cumpagni lu circaru
nta dda notti di spaventu
troppu tardu lu truvaru
nta dda chiana di turmentu
comu arancia fatta a spicchi
lu truvaru dda vicinu
ricugghennu pizzuddicchi
di lu corpu di Pippinu
iu la sentu cca vicinu
ca resisti e ancora un mori:
è la vuci di Pippinu
ca mi trasi nta lu cori
e mi dici di luttari
pi na terra libbirata
di la mafia e li so affari
ca la vonnu cunnannata
(Ezio Spataro)