Chissu passa lu cuvernu !

Isava li vuci, smuvìa lu nfernu

sbattennu nta la tavula lu pusu

"Chissu passa lu cuvernu !"

dissi un patri a lu figghiu schifittusu

Quannu si campava a pani schittu

to patri canuscì lu gran pitittu

ma ora chi serbi cantariti li missi

figghiu crisciutu a kinder delissi?

Tu cridi ca la vita è bella

quannu metti lu crissinu
n'moddu a la nutella !

Ma ora l'epica si fa trubbula

fineru li tempi di girari la strummula

ora to patri ti parra cchiù modernu:

"Chissu tassa lu cuvernu ! "

figghiu figghiu tu vò la nutella

ma cca c'è di paari la gabella

ora a li bulletti si iunci puru l'IMU
ora s'accurzà lu to crissinu !

Iu ti lu dissi, sempri ti lu dissi

è megghiu lu pani di lu kinder delissi

e ora ca paavi assai cara la bulletta

na fedda di pani è ddocu chi t'aspetta

E' tempu di canusciri lu pani

lu pani ca si mancia tuttu sanu

tu stessu ora vidi e ti nn'adduni

ca nuddu leva cchiù lu muddicuni

Ora ddu Mulinu tuttu Biancu
si fici assai vecchiu e puru stancu
è tempu di turnari a la natura
è tempu di iri a cogghiri virdura

Arriva la nuttata senza luna

e torna lu pitittu a fari scempi

ristaru sulu l'ossa di li pruna

ca di sucalli fineru ormai li tempi

Chisti su tempi assai moderni

e tecnici sunnu li cuverni

chistu è lu tempu c'avanza la Finanza

è tempu ca nni chianci arrè la panza !

Avanza di notti lu pitittu

purtannu prufizii di pani schittu,

chiueru li putii di l'abbunnanza

unni parìa eterna la spiranza

La spisa doli, la spisa è cara
turnaru li briganti saccunara
fannu spaventu e fannu dannu
vannu a la vintura pi ghiri saccuniannu

Tornaru li addini e la canigghia
li fimmini lassaru la pruvigghia

e l'acqua si fici accussì cara

ca scinninu a lavari a la ciumàra !

Scurri lu ciumi siccu e malatu

scinni nta lu mari ncatramatu

e ora pi curari lu so mali

purtaru la so acqua a lu spitali.

(Ezio Spataro)