Na vota m'attintava
la musica metallara
e ogni ghiornu chi passava
m'affussava nta la vara
Mi vistìa sempri di nivuru
nun purtava però luttu
di metallu facia ciavuru
la me musica era tuttu
Magliettini metallari
nn'accattavi nta ogni fera
accussì spinnìa danari
era propria n'atra era
Di lu gruppu Sepurtura
m'avia fattu na curtura
nta ss'avanzi di galera
cci sunava Cavalera
C'era un gruppu assai bastardu
ci sunava Dave Lombardu
e maniava ddi bacchetti
ca trimavanu li tetti
Cu attintava e nun capìa
di sta musica dicìa:
"pari scrusciu di na lanna,
unu attenta e pò s'addanna"
Quali foddi lu mmintaru
stu metallu arrancidusu ?
Addumanna a lu firraru
ca ogni ghiornu nni fa usu
Ora sempri vaiu pinsannu
quanti corpa detti tannu
dda chitarra strapazzata
si zittì nta n'agnunata
Si carmà la gran faidda
ca cumanna sempri idda
chi ti veni e chi ti spinci
e a carmalla tu nun vinci
Ora è friddu lu metallu
è difficili a maniallu
la me furma la pigghiavi
ma di iddu un mi scurdavi
(Ezio Spataro)
