Oramai mastru Sanicula mi purtà a mala strata. Cu la scusa ca sugnu poeta anarghiru m'addumanna sempri di scriviri poesii a tema e senza cumpenzu. Na vota "La parma", n'atra vota "Lu Natali", n'atra vota "Lu Cimiteru", e ora arrivamu puru m'paraddisu a scuitari Santu Ciru. Ma iu ora senza babbiari lu ringraziu a mastru Sanicula ca cu li so cunti curiusi e azzannati mi duna spirazioni di scriviri cosi ca forsi iu mai avissi scrittu, comu sta puisia di Santu Ciru e li duttura.
Di nicu mi nsignaru ca Santu Ciru era dutturi anarghiru, vinissi a diri ca picciuli nun si nni pigghiava. Ora puru iu quannu vaiu a curarimi li denti, lu dentista picciuli si nni pigghia accussi picca ca certi voti nun capisciu comu po campari. E chi diri di tanti duttura ca pi fari na visita a dumiciliu nun si pigghianu nenti, n'atra vota quannu avia la frevi a quaranta nni vinni unu e cci vulia dari cinquanta euru; nun ci fu forma e manera di fariccilli pigghiari. E chi diri di sta naziuni unni lu sistema sanitariu funziona a roggiu, ca li cchiù puvureddi su curati megghiu di li ricchi. Pi daveru Santu Ciru fussi cuntentu di vidiri quantu ciavuru di santità si po cogghiri ntall'ariu.
Santu Ciru scinnennu pi la via
ncuntrava na brigata di duttura
allura si ferma e ddocu spia:
“attì quantu pigghiati all'ura?”
Nuatri cuntiggiamu sempri a visita
rispunnianu a coru li duttura,
d'oru circamu la gemma e la pipìta
e pi chissi curamu tutti li dulura.
Ma allura nun siti anarghiri
comu nna l'antica Età
quannu l'oru nun putià luciri
cchiù di la Fidi e di la Carità...
...Anarghiru l'Egittu!!
ripitianu a coru li duttura
nuatri avemu grassu lu pittitu
e l'oru l'accucchiamu cu primura!!
La fidi chi ancora prufissati
nun vasta a cunquistari lu tesoru
ca saggiamenti nta lu cielu accumulati
e vali chiossà di tuttu l'oru?
Nuatri semu chiddi di la Sanità,
idda nni cunfirisci nnomu e dignità
lesta scrivemu la ricetta cu la cura,
di lu Statu Laicu nuatri semu li duttura!!
E si un puvureddu scunsulatu e sulu
cci aumenta tuttu nzemmula u duluri?
Allura pi vuatri è comu un mulu
c'azzuppannu pi iddu un ci su curi…
S'avi l'oru e li brillanti di purtari
sicuru ca la cura si cci po truvari
ma siddu è un mulu comu dici tu
allura la quistioni nun nni tocca cchiù.
Siddiatu pi sti misiri paroli
Santu Ciru nta lu cielu arritiratu
dissi a lu Signuri "a mia mi doli,
ma l'oru di pietà nun fu truvatu".
(Ezio Spataro)
