vannu tutti a la palestra
e ci pari cosa lieta
siddu grassu un ci nn'arresta
dda c'è fetu di suduri
e cci passanu li uri
cu ddi pisa nta li vrazza
ca la vita cci l'ammazza
dda su tutti palestrati
sunnu puru lampadati
e ristannu ancora n'tema
su nzivati cu la crema
Si nni vannu nta la spiaggia
pi pigghiari di culuri
sutta u suli e la so raggia
a ghiccari lu suduri
la me panza mmeci è giarna
nun canusci abbronzatura
e di dintra è na caverna
tutta ricca di natura.
Cu si pigghia lu Danoni
e cci metti la scagghiòla,
chi allamicu e dui coglioni
la so dieta mi scunsòla..
Tocca cca la panzicedda
ca ti parra a cori apertu
la to scarsa virduredda
ti fa sentiri cchiù spertu??
Iu mi manciu la fettina
cchiù di grassu ca di sangu
e tu gran pirsuna fina
ora pigghi a mia pi fangu..
Ruticeddi di sasizza
vennu appressu cu lu crastu
lu manciari cca m'appizza
ed è chiusu cu lu ngastu
ccà lu grassu cchiù nun nesci
ccà murì la so spiranza
e si un gniornu m'arrinesci
iu m'addevu n'atra panza
(Ezio Spataro)