Ginz Sfardati

Vitti un picciottu cu i ginz sfardati

ca fuma sempri sicaretti scruccati
picciuli so patri un ci nni duna
parra cu a so tipa e cci arrispunni a luna.


Avi tri aneddi appizzati nta l'aricchi
e di sta cosa li so amici vannu licchi
li capiddi l'avi sempri a scussuneddu
a lu specchiu si talia e si vidi beddu.


Cci piaci fari musica arraggiata
e sona sempri cu na chitarra scurdata,
ci fà nesciri u scrusciu da so vita
di li sciarri chi si fà cu la so zita.


Na vota si nni ia a lu catechismu
ora mmeci si nsignà lu comunismu,
addivintà accanitu animalista
un cani è cchiù d'un cristianu nta so lista.


La Chiesa cci pari assai antiquata
ci parra di na vita assai annacquata,
ogni cosa la voli legalizzata
ca pò ci pensa iddu a fari la rullata.


Lu so mottu è "fari nzoccu vogghiu"
iunciri sali, rianu e ogghiu,
a piacimentu si fa la sò nsalata
a sò vita accussì è bella e cunsata.


Ci siddianu tutti cosi pi definizioni
ca chissa pi iddu addivintà na religioni,
stasira si senti troppu cullassatu
nun si senti nè zitu e mancu lassatu.


Cu a so tipa avi na menza storia
certi voti u fa gghiri m'paranoia,
si cci capita d'aviri un menzu sgamu
ognunu è liberu, ca sordi unn'appizzamu.


Unn'assicuta amuri e mancu vita
c'è cu si fa zitu e c'è cu si marita,
iddu ca è un tipu zen ambientalista
di sicuru nun fa parti di ssa lista.


E' un picciottu troppu modernu
nun ci serbi nè matita nè quadernu,
l'appunti da sò vita si sfardaru
quannu i sò capiddi si isaru e si scunsaru.

(Ezio Spataro)