Scrivu na poesia a lu iornu
pi dari ancora ciatu a la me vita
mi levu li negghi di ntunnu
accussì pozzu cuntari li me ita
cercu n'atru fogghiu di nchiappari
cu strofi ca nun sannu a cu parrari
sudati ncapu un pezzu di matita
si fannu sciddicusi li me ita
Attrovu li rimi a tempu persu
circati nta lu scuru di l'ammucciu
truvannu li paroli a lu me versu
allura nta lu fogghiu mi li ncocciu
Scrivu na poesia a lu iornu
e sugnu un abitanti di stu munnu
cci sbattu la testa e mi cunfunnu
viu nesciri di ntesta n'atru cornu
allura pi sbrugghiari la matassa
mi dicinu "tu canta ca ti passa"
lu mali pari allura ca s'arrenni
davanti a li matiti e a li penni
nun sacciu siddu è la me vittoria
o siddu è farsità di vanagloria
canusciu sulu un pezzu di matita
pi dari ancora ciatu a la me vita
(Ezio Spataro)
(Ezio Spataro)