Firdinannu Maurici

Firdinannu Maurici
è unu chi scrivi libbra,
quannu leggiu nzoccu dici
lu me cori ancora vibbra,
mi liggivu cosi beddi
di la Sicilia Saracina
di furtina e di casteddi
tutti juti a la ruvina.

Lu mè ardiri fici granni
ca na vota lu circavu,
nfina ddintra cu li ammi
iu cci ivi e tuppuliavu,
cu a calunia c'avia vistu
un dammusu saracinu
di li scatti già pruvvistu
cci purtavi lu rullinu.

Iddu allura misi focu
e fissà l'appuntamentu,
p'arrivari nta lu locu
e taliari u munumentu,
lu me preu si fici granni
ca ci dissi a li me amici:
nun partiti pi li banni
ca ava beniri Maurici".

Quali fu la me surprisa
quannu vinni au me paisi,
si prisenta cu a cammisa
e li sannuli già misi,
appizzata avia na giacca
ca sirbìa pi l'occasioni,
di la cruccia si la stacca
sulu quannu va a lezioni.

Un pinseru ancora arrasca
a taliari lu so abbigghiu
pi passari nta la frasca
di li sannuli un c'è megghiu!!
Lu violu nta ddu raggiu
chinu chinu di spinazza
nun ti duna certu l'aggiu
di passiari nta la chiazza!!

A casciuni a la vintura
acchianamu cu l'equipe
caminannu a deci allura
scapputtannu la so jeep,
e pigghiannu na trazzera
ca purtava a lu vadduni
la lancetta ddà s'azzera
si camina a brancicuni

nta na frasca già crisciuta

a l'appedi caminannu 

addisiannu na vivuta,
nta lu suli ddà sudannu
lu dammusu saracinu
nn'aspittava dda vicinu
cummigghiatu di ruvetta
era ddà c'ancora aspetta

(Ezio Spataro)