Chista chi leggi
è na puisia ca s'azzànna,
comu cuteddu ca un tagghia
e manu ca s'addànna,
la leggi na vota
e la vulissi capìri,
ma si unn'ha pacenzia
allura unn'ha unni iri.
Si ora io scrivu
chiddu chi pensu,
m'addumannu
si tu ci trovi lu sensu,
io spennu paroli
pi lu me sintimentu,
poi tu li pigghi
e li ecchi a lu ventu.
Na vita, na storia,
amuri e duluri,
pi daricci focu
nun ti serbinu uri,
t'abbasta un secunnu
pi fari la vampa,
e cu mori mori,
e cu campa campa...
Arti unn'avemu
e mancu la parti,
rripizzamu vistita
senza essiri sarti,
nun vulemu l'inchinu
e mancu lu censu,
mi nesci di l'occhi
diri nzoccu pensu.
Tu si allittratu
di poetari ha lu versu,
leggiri sti rimi
pi tia è tempu persu,
la mastrìa di poeta
è cosa assai ràra,
damminni n'anticchia
ca mi incu la quartàra.
(Ezio Spataro)
