Na vota avìa un muturi..

Na vota avìa un muturi

di media cilindrata
un centuvinticincu
enduro fuoristrata

Avìa li parafagni
luntani di li roti
e tutti li santi voti
lu fangu mi sbrizziava

Di Brannu a lu Cutranu

na strata tinta e stritta
di un cupirtuni sanu
rristava na minnitta

vulava muntarozza
pigghiava li trazzeri
lu fici vozza vozza
scinnennu scaluneri

Vicinu a Bolognetta
unni la strata è retta
lu me accelleraturi
facìa u travagghiaturi

Lu frenu chiddu a discu
partennu ancora friscu
quadiava nta u percorsu
strincennu lu so morsu

Cu a tanga a funnurìgghia
partìa pi la Ficuzza
la spia ca s'arrispiggha
e a strata ca unn'accurza

Cu l'accelleraturi
è ura ca mi fermu
benzina e cugninturi
nun duranu n'eternu

la povira cannila
nun sapi chi bbruciari
e mmucca un teni pila
quann'avi d'astutari

Si scalu ancora marcia
lu sentu nta lu cori
l'arrivu nunn'affaccia
e u me muturi mori

Chi pozzu cca spirari
ristannu ancora m'panna
c'è sulu d'ammuttari
e un cori chi s'affanna

(Ezio Spataro)