Na ruticedda di sasizza

Vastà na ruticedda di sasizza
pi spanniri stu ciavuru ntall'ariu!
Ancora lu cuteddu nun ci appizza
è cruda di lu latu a lu cuntrariu!

La peddi ntunnu ntunnu sta friennu
e dintra lu caddozzu va cucennu
è tempu di pigghiari lu cuteddu
ca punci la so guaina di vudeddu

Punciutu lu caddozzu si rovescia
iccannu lu so grassu ciavurusu
adaciu, cu lu tempu e senza prescia
lu ecca nta lu focu vigurusu

Lu grassu duna lena e fa la vampa
s'adduma lu tizzuni addurmisciutu
luntanu lu mmitatu s'arricampa
sintennu lu caddozzu già cuciutu.

Lu tempu va passanu pi lo focu
ci voli la paletta e lu so iocu
ciusciata p'animari arrè la braci
si fici comu l'ala d'un rapaci.

E ora s'arripigghia la faidda
lu ventu ci ridetti la so forza
la vampa riturnà comu na stidda
e ora la so luci nun si smorza.

Pigghiata di culuri la sasizza
ti duna lu signali ch'è cuciuta
la rota nicaruta di larghizza
chiamà ca voli essiri scinnuta.

Mittennula nta u piattu vapurusa
aspetti ca si carma di caluri
ti isi la cammisa di li pusa
mancialla cu li manu un ti nni curi

Lu senti ca t'abbrucianu li ita
vulissi pacinziari p'un minutu
è comu si finissi la to vita
e u tempu si facissi cchiù curnutu

(Ezio Spataro)