Munnizza differenziata

Firnicia differenziata

è ghiccari la munnizza,
ricugghiuta o stramminata
nun ci nn'è mancu na stizza!!

Cuntu l'urtimu biduni
e m'addumu a sicaretta,
dunni ettu lu muzzuni??
Sta dumanna ancora aspetta!!

Nta li scorci chi ghiccavi
c'è mmiscata na muddica,
"comu fu ca un ci pinsavi?"
Lu biduni s'allammica!!

La muddica mpertinenti
cu li scorci un si cci parra,
carta e plastica cuntenti
si talianu arrè la sciarra!!

Scarpi vecchi avia d'ittari
cu li lazza di cuttuni
mi nni vogghiu ormai disfari,
quannu attrovu lu biduni...

Ma lu pettu di la scarpa
è diversu di lu taccu
lu biduni pigghia e accarpa,
ma tu sà qual'è lu saccu??

Di quant'avi chi ngrassavi
nun mi serbi cchiù lu cintu,
nta lu fustu m'affacciavi,
nun mi ntisi assai cummintu!!

Ci su parti di metallu
ma è di umma lu me cintu
forsi fazzu prima a dallu
ca a ghittallu veni tintu!!

(Ezio Spataro)