Cu stu beddu Gratta e Vinci
nta l'ingannu tu cci m'pinci
e lu Statu assai cuntentu
ti purtà a lu sfinimentu
Quant'è favusu lu Statu
ca ti vinni la striscietta
quanti sordi t'ha rubbatu
ma sicuru ti rispetta
Si nni fici sordi a ciumi
li sacchetti s'ha ghincuti
forsi acquisti cchiù saluti
si ti gratti a manciaciumi
Ma stu nnomu un mi cumminci
nun chiamallu "Gratta e Vinci"
quannu è a rischiu la to peddi
megghiu diri "Gratta e Perdi"
e lu Statu ancora arrùnchia
cu stu iocu troppu a mincha
nni crià la dipendenza
dannu focu a la cuscienza
Vinci unu nta un miliuni
tuttu d'iddu è lu vuccuni
e sti sordi si li ntasca
picchì c'è cu ancora arrasca
Megghiu iri addumannari
ca lu statu furaggiari
ca si fa li surdiceddi
e ni pigghia pi purceddi
(Ezio Spataro)
